Estamos levando a cabo un estudo dos recursos patrimoniais do concello de Ames; é un traballo longo, que nos levará aínda algúns meses. É curioso ver como muda radicalmente a nosa perspectiva do pasado, sobre todo dos feitos máis cotiáns, cando visitas os muíños, as aldeas e outros testemuños do pasado e os ves cos ollos da información fornecida polos documentos do arquivo.
As vellas pedras énchense de vida e de historias que nos trasladan ao mundo dos nosos avós e avoas. A unha paisaxe diferente, de agricultura diversificada e unha explotación coidadosa e algo máis racional dos recursos dispoñibles. Ben é certo que aquelo non era unha Arcadia feliz e que a vida da maioría era máis ben miserable, pero ollando con atención hai moito do que aprender.

O pasado sábado 23 tivo lugar a inauguración do Centro de Interpretación da Muralla de Lugo.
O desenvolvemento deste proxecto foi complexo e longo, tanto para nós como para o noso cliente, Stoa pero a día de hoxe os resultados non poden ser máis satisfactorios. O traballo de documentación desenvolvido por dehistoria foi unha modesta aportación a este proxecto que se sitúa neste momento á cabeza do panorama dos museos e espazos patrimoniais de Galicia.
¡Os nosos parabéns a todos e todas as implicadas!.
Este centro de interpretación será unha referenza ineludible para visitantes e lucenses e amosará a todos e todas non so os aspectos máis coñecidos da muralla e a súa historia, senón tamén outros moitos detalles e feitos que axudarán a comprender a súa real monumentalidade.
Clicade aqui para descargar o tríptico informativo.

Somos unha empresa de mulleres e cremos que iso implica un xeito concreto de facer negocios. Tamén conleva certas responsabilidades e cargas xa que, digan o que digan, no camiño da igualdade queda moito treito por facer.
A Rede Galega de Empresas convidounos a participar o pasado sábado na súa xornada, que estaba dedicada precisamente á relación entre muller, empresa e igualdade.
Tivo lugar en Vigo; alí no Verbum baixo o suxestivo título de Liderando e construíndo Galiza desde a igualdade tivemos oportunidade de compartir o noso proxecto empresarial e as nosas reflexións.
Foi unha tarde moi interesante e, sobre todo enriquecedora. Nunca se acaba de aprender.

Até o 30 de decembro estará no Museo do Pobo Galego a exposición Barrio de San Pedro. Porta do Camiño. Aínda que se trata dunha produción do Museo, que con esta mostra pretende celebrar os seus primeiros 30 anos, houbo un pequeno espazo para que dehistoria -entre outras entidades- colaborara neste fermoso proxecto.
Desde unha nova perspectiva, podemos achegarnos outra vez á historia deste singular barrio compostelán que, como ben pode verse alí, ten moitas historias que contar.

Xa están dispoñibles na web do Concello de Ames os arquivos das nosas rutas con GPS. Propoñemos a realización de catro percorridos diferentes que teñen como eixo temático aos Condes de Altamira, señores noutro tempo de boa parte deste concello. De aí ven o nome do conxunto de itinerarios: As Terras dos Condes.
Na páxina de descargas atoparedes os 4 percorridos cos seus respectivos arquivos: os que implementaremos no noso trebello GPS e os que nos servirán para descobrir dun xeito diferente as parroquias de Trasmonte, Lens e Agrón.
Este produto é froito dun laborioso traballo de investigación que acometemos en colaboración con Dimensiona.

Até final de ano, dehistoria será a encargada de levar aos centros de Ensino Secundario Obrigatorio a Campaña Mira por el da Consellería de Cultura e Deporte.
É un proxecto atractivo que marcará o inicio do desenvolvemento desta actividade noutros centros; con ela amosarase a mozos e mozas a importancia de querer e respectar o noso patrimonio cultural (material e inmaterial) herdado. O noso deber moral e legal e protexelo e respectalo.
Neste trimestre os nosos equipos visitarán centros pertencentes a todas as provincias galegas, a grandes cidades (Vigo) e vilas (Ribadeo) , da costa (Muros) ou do interior (Forcarei).
As actividades a desenvolver buscan, sobre todo, proporcionar un ambiente de aprendizaxe lúdico e creativo no que os alumnos e alumnas participen activamente. Os seus resultados comezaran pronto a verse na web da propia campaña.

Neste mes de outubro, durante o Seminario Turismo e novas tecnoloxías terá lugar a presentación en sociedade do noso proxecto de investigación sobre rutas GPS, levado a cabo baixo a dirección de Dimensiona.
Xuntos, desenvolvemos un novo produto que está agora rematando a súa fase de experimentación. As rutas autoguiadas con GPS ofrecerán a concellos, administración ou establecementos turísticos a posibilidade de deseñar percorridos turísticos ou culturais sen necesidade de investimentos costosos en sinalización. Un GPS se encargará de dirixir ao camiñante ou ao automobilista ao longo do itinerario; o noso cometido é a elaboración dos contidos da ruta, que van nunha guía impresa complementaria.
O primeiro prototipo tivo como protagonista á Casa Grande de Vilanova, na parroquia de Remesar, concello da Estrada e o roteiro servía para percorrer o fermoso camiño entre a Casa e o Pazo de Oca. O segundo, porase en marcha nos próximos días no Concello de Ames; finalmente, a Ribeira Sacra será o escenario doutro dos nosos prototipos.
Moitas grazas a todos eles por colaboraren con nos e a Dirección Xeral de Investigación, Desenvolvemento e Innovación financiar este novidoso proxecto de innovación.

Nestes días rematan, por este curso, as actividades do programa “A Historia vai por barrios”. É hora de recoller as exposicións e de facer avaliación do proxecto.
San Pedro, A Rocha, Villestro, Vite, o Ensanche e Enfesta. Barrios e parroquias moi distintas pero que contribuiron de igual forma a conformar a cidade na que hoxe vivimos.
Coas exposicións e as actividades, todas e todos coñecímonos mellor e aprendimos a valorar un pouco mais os espazos nos que vivimos e esos vellos trebellos que temos nas nosas casas. Foi unha aventura divertida e enriquecedora para todas e todos os que dun xeito ou outro tivemos que ver co proxecto.
Desde aqui, o noso mais sinceiro agradecemento aos veciños e veciñas, ao personal da rede de centros socioculturais, ás asociaciones veciñais, aos colexios e a todas as outras entidades que colaboraron na boa marcha deste proxecto.

Hoxe chegamos a Enfesta. É a última etapa de “A Historia vai por barrios” antes do verán. A mostra terá lugar no Local Sociocultural e estará ali até o 10 de xuño.
Tal e como a investigación ven a demostrar, o pasado desta parroquia -mesmo nos tempos nos que non era concello- é riquísima e moi interesante. Delo da fe un patrimonio histórico moi variado que vai dos castros de Formaris ou Roda dos Mouros -doados de ver desde a N-550- até a antiga estación do ferrocarril da Sionlla: muíños, vivendas tradicionais, hórreos e palleiras, etc.
A exposición que hoxe inauguramos fai un pequeno percorrido por todos estes aspectos; ao longo da visita, a veciñanza e o resto da cidade -cando entre en rotación por outros barrios- coñecerán un pouco mais desta outra Compostela, rural e conservadora das mais antigas tradicións.

Onte pechamos a exposición “A historia do comercio en Compostela”, organizada dentro do programa de actos do mes do comercio da Concellaría de Promoción Económica do Concello de Santiago.
Foi unha pequena homenaxe a este sector tan fundamental para a vida da cidade, tanto que a propia Compostela e os seus veciños non existirían de non ser polo esforzo permanente dos comerciantes que trouxeron os alimentos, as ferramentas, as roupas, etc. En fin, todo o necesario para a vida.
Constituíu tamén un primeiro intento por localizar e valorizar o patrimonio ligado a esta actividade económica. A pesares da limitación dos espazos de almacenamento, da fugacidade das modas ou mesmo, do paso das xeracións e os tempos, son moitos os establecementos que conservan os testemuños do seu pasado. Nas nosas vitrinas ou a través de fotografías puidemos ver unha pequena mostra.